ბაზისბანკის ისტორია, 1993 წელს, სულ რაღაც ერთი სერვისცენტრით, რამდენიმე თანამშრომლითა და 5 მილიონი ლარის კაპიტალით იწყება, რასაც პოსტ–საბჭოთა პერიოდი, თავისუფალ საბაზრო ეკონომიკაზე გადასვლა, მძიმე პოლიტიკურ-ეკონომიკური რეალობა და სხვა უამრავი დაბრკოლება მოჰყვა.

90-იან წლებში, 300-მდე მოქმედმა ბანკმა ვერ გაუძლო ქვეყანაში შექმნილ კრიზისულ მდგომარეობას, ბაზისბანკის გუნდმა კი რაციონალური გადაწყვეტილებებით, მკვეთრად ჩამოყალიბებული სტრატეგიითა და თანმიმდევრული ნაბიჯებით მოახერხა ამ რთული გამოცდის ჩაბარება და შემდეგ ეტაპზე გადასვლა. ამ დროისათვის, კომპანიის მიზანი პროგრესული ბანკის შექმნა იყო, რასაც მომხმარებლებლებთან მაქსიმალური კომუნიკაციითა და პარტნიორობით ახერხებდა. მათი დიდი ნაწილი ბანკთან ერთად გაიზარდა და დღემდე ერთგულ თანამოაზრედ დარჩა.

2000-იანი წლები ბაზისბანკისთვის წარმატებულად იწყება: ახალი სათავო ოფისი, სერვისცენტრების ქსელი, საკუთარი ბარათების გამოშვება, პირველი საკრედიტო ბარათი ქართულ ბაზარზე და ასევე პირველი საქმიანი ურთიერთობები უცხოელ პარტნიორებთან. ამ დროისთვის, კომპანია მხოლოდ საკუთარი რესურსებით ახერხებდა ზრდაზე ორიენტირებული, სტრატეგიული პლატფორმისთვის საფუძვლების მომზადებას, რის გამოც მალევე გახდა ინტერესის ობიექტი უცხოელი ინვესტორებისთვის.

2008 წელს, EBRD-ი ბაზისბანკის აქციების 15%-იანი პაკეტის მფლობელი გახდა და კომპანიაში დაიწყო ორგანიზაციული სტრუქტურის სრულყოფის პროცესები. გამოიკვეთა ახალი პრიორიტეტები: ძლიერი იმიჯის შექმნა და საერთაშორისო პრაქტიკის ადაპტირება. მენეჯმენტისა და თანამშრომლების უდიდეს შრომას უკვალოდ არ ჩაუვლია, ბანკის ცნობადობა საგრძნობლად გაიზარდა და კომპანიამ მალევე შეძლო საპატიო პოზიციის დაკავება საბანკო სექტორში.

2012 წელს, ჩინურმა კომპანია „ჰუალინგ ჯგუფმა“, ჩვენი ქვეყნის ერთ-ერთმა უმსხვილესმა ინვესტორმა, ბანკის აქციების 90%-ი შეისყიდა, მოგვიანებით კი, თავისი წილი 92,30%–მდე გაზარდა. ძლიერი აქციონერის ფინანსურმა მხარდაჭერამ ბანკს გზა ახალი შესაძლებლობებისაკენ გაუხსნა და შედეგმაც არ დააყოვნა, ბაზისბანკი ქართული ბანკების რეიტინგში შვიდი პოზიციით დაწინაურდა - მეთერთმეტე ადგილიდან, უმსხვილესი ქართული ბანკების ხუთეულში გადაინაცვლა.

დღეს ბაზისბანკის ჯგუფი ქვეყნის წამყვანი ფინანსური ინსტიტუტია და საბანკო მომსახურებასთან ერთად, დაზღვევისა და ლიზინგის ბიზნესმიმართულებებსაც აერთიანებს.